ഐപിഎല്ലില് 18 റണ്സിന് ലഖ്നൗ സൂപ്പര് ജയന്റ്സിനെ തോൽപ്പിച്ച് റോയൽ ചലഞ്ചേഴ്സ് ബാംഗ്ലൂര് പോയിന്റ് പട്ടികയില് രണ്ടാം സ്ഥാനത്തെത്തി. സ്കോര് റോയല് ചലഞ്ചേഴ്സ് ബാംഗ്ലൂര് 20 ഓവറില് 181-6, ലഖ്നൗ സൂപ്പര് ജയന്റ്സ് 20 ഓവറില് 163-8. 182 റണ്സ് വിജയലക്ഷ്യം പിന്തുടര്ന്ന ലഖ്നൗ 20 ഓവറില് 8 വിക്കറ്റ് നഷ്ടത്തില് 163 റണ്സിലൊതുങ്ങി. ഏഴ് കളികളില് നിന്ന് 10 പോയിന്റാണ് ബാംഗ്ലൂരിനുള്ളത്. ഗുജറാത്ത് ടൈറ്റന്സാണ് പോയന്റ് പട്ടികയില് ഒന്നാമത്. ബാംഗ്ലൂർ രണ്ടാമതെത്തിയതോടെ രാജസ്ഥാന് റോയല്സ് മൂന്നാം സ്ഥാനത്തായി. മൂന്നാം സ്ഥാനത്തായിരുന്ന ലഖ്നൗ ബാംഗ്ലൂരിനെതിരായ തോല്വിയോടെ നാലാം സ്ഥാനത്തേക്ക് വീണു.
ലഖ്നൗ ആദ്യ ഓവറില് മുഹമ്മദ് സിറാജിനെതിരെ രണ്ട് ബൗണ്ടറി അടിച്ചാണ് തുടങ്ങിയത്. ആദ്യ ഓവറില് ഒമ്പത് റണ്സടിച്ച ലഖ്നൗവിന് പക്ഷെ ഗ്ലെന് മാക്സ്വെല് എറിഞ്ഞ രണ്ടാം ഓവറില് അഞ്ച് റണ്സെ നേടാൻ കഴിഞ്ഞുള്ളൂ. പവര് പ്ലേയിലെ അവസാന ഓവറില് രണ്ട് ബൗണ്ടറി അടക്കം 11 റണ്സടിച്ച് ലഖ്നൗ തരക്കേടില്ലാതെ തുടങ്ങിയെങ്കിലും കൃത്യമായ ഇടവേളകളില് വിക്കറ്റ് നഷ്ടമായതാണ് തിരിച്ചടിയായത്.
