ന്യൂയോർക്ക് ബ്രൂക്ലിനിലെ സബ്‌വേ സ്‌റ്റേഷനിൽ വെടിവയ്പ്പ്. ഒട്ടേറെ പേർക്ക് പരുക്കേറ്റു. സബ്‌വേ സ്റ്റേഷന്റെ പ്ലാറ്റ്‌ഫോമിൽ രക്തത്തിൽ കുളിച്ച യാത്രക്കാരുടെ ചിത്രങ്ങൾ പുറത്ത് വന്നു.
അഞ്ചടി അഞ്ചിഞ്ച് ഉയരമുള്ള പുരുഷനാണ് ജനത്തിന് നേരെ വെടിയുതിർത്തതെന്ന് സംഭവത്തിന്റെ ദൃക്‌സാക്ഷികളായ പൊലീസ് ഉദ്യോഗസ്ഥർ പറയുന്നു. ഈ വ്യക്തി ഗ്യാസ് മാസ്‌കും ധരിച്ചിരുന്നു.
സബ്‌വേയിൽ നിന്ന് പുക ഉയരുന്നു എന്നായിരുന്നു ന്യൂയോർക്ക് പൊലീസിന് ലഭിച്ച സന്ദേശം. അവിടെ എത്തിയപ്പോഴാണ് വെടിയേറ്റ് കിടക്കുന്നവരെ കാണുന്നത്. വെടിയുതിർക്കുന്നതിന് മുൻപ് പുകമറ സൃഷ്ടിക്കാനായി ആക്രമി എന്തോ വലിച്ചെറിഞ്ഞുവെന്നും റിപ്പോർട്ടുണ്ട്.
അന്വേഷണം പുരോഗമിക്കുന്നതിനാൽ ബ്രൂക്ലിന്റെ 36-ാം തെരുവും, 4-ാം അവന്യൂ ഏരിയയും ഒഴിവാക്കണമെന്ന് ജനങ്ങളോട് ന്യൂയോർക്ക് പൊലീസ് പറഞ്ഞു.
